DAHIL SA PAGMAMALTRATO NITO SA KANYANG KATULONG, PINAGMULTA NG KORTE SUPREMA ANG CLERK OF COURT NG TACLOBAN CITY REGIONAL TRIAL COURT, BRANCH 7 NA SI TERESITA CALLEJA NG LIMANG LIBONG PISO(Php5,000).

AYON KAY LEONIDA PABLEJAN, ANG MENOR DE EDAD NA KATULONG NI CALLEJA, SINASAKTAN AT PINAGMAMALUPITAN UMANO SIYA NG KANYANG AMO. NANG MAGREKLAMO SIYA KAY CALLEJA DAHIL SA PAGLIMITA NITO SA KANYA SA PAGGAMIT NG TUBIG, SINAMPAL SIYA NI CALLEJA HANGGANG SA DUMUGO ANG KANYANG BIBIG AT INIUNTOG PA ANG KANYANG ULO SA PADER. DAGDAG PA NI PABLEJAN, PINAGBANTAAN SIYA NI CALLEJA NA PAPATAYIN KUNG HINDI SIYA LALAYAS.

ITINANGGI NI CALLEJA ANG MGA PARATANG AT SINABING HINDI DAPAT PANIWALAAN SI PABLEJAN DAHIL MAGKAKASALUNGAT ANG KANYANG SALAYSAY.

MAS MATIMBANG ANG SALAYSAY NI PABLEJAN DAHIL ITO’Y POSITIBO, MALINAW AT DETALYADO, SABI NG KORTE. DAGDAG PA DITO ANG TESTIMONYA NG ISANG KATULONG AT ANG MEDICO-LEGAL REPORT AT PSYCHIATRIC EVALUATION. ANG MALILIIT NA “INCONSISTENCIES” O HINDI PAGKAKATUGMA-TUGMA SA PAHAYAG NI PABLEJAN AY KATUNAYAN NA TOTOO AT HINDI NIYA KINABISADO ANG LAMAN NG SALAYSAY.

AYON SA KORTE, ANG MGA EMPLEYADO NG HUDIKATURA AY DAPAT MAGING MAGANDANG EHEMPLO HINDI LAMANG SA PAGTUPAD NG KANILANG OPISYAL NA TUNGKULIN KUNDI MAGING SA KANILANG PRIBADONG PAKIKIPAG-UGNAYAN SA IBANG TAO UPANG MAPANGALAGAAN SA LAHAT NG ORAS ANG MAGANDANG PANGALAN AT TAYO NG MGA KORTE SA LIPUNAN. (A.M. No. P-06-2102, Leonida O. Pablejan vs. Teresita J. Calleja, Clerk of Court, Regional Trial Court, Branch 7, Tacloban City, January 24, 2006)