PINAGMULTA NG KORTE SUPREMA NG DALAWANG LIBONG PISO (Php2,000) SI ARNIEL CRUZ, CLERK NG CABANATUAN CITY REGIONAL TRIAL COURT DAHIL SA PAGTATANGKA NITONG MAKIALAM SA PAGPAPATUPAD NG KAUTUSAN NG KORTE SA PAMAMAGITAN NG PAGPAPADALA NG TEXT MESSAGE.

NAGLABAS NG KAUTUSAN SI JUDGE EVELYN DIMACULANGAN-QUERIJERO KAY SHERIFF ANGELITO ANNANG PARA KUNIN ANG MENOR DE EDAD NA SI ‘YZA’ MULA SA KANYANG LOLA AT IBIGAY ANG PANSAMANTALANG KUSTODIYA NG BATA KAY SINFOROSO ANG. HINANAP NI SHERIFF ANNANG SI YZA SA ESKWELAHANG PINAPASUKAN NGUNI’T HINDI NA NIYA ITO NAKITA AT NABALITAANG ITINAGO NA NG INA. NAG-TEXT SI CRUZ KAY SHERIFF ANNANG AT SINABING “PRE, PAMANGKIN KO ANG BATA, BAKA PUEDE MO GAWAN NG PARAAN, KAWAWA NAMAN YUNG NANAY.”

INIREKLAMO NI ANG SI CRUZ AT PINAGBINTANGANG SIYANG NAGPAKALAT NG IMPORMASYON SA INA NI YZA, DAHILAN UPANG MAITAKAS ANG BATA AT HINDI MAPATUPAD ANG KAUTUSAN NI JUDGE QUERIJERO.

SINABI NG KORTE NA BAGAMA’T WALANG DIREKTANG EBIDENSIYA NA MAGTUTURO KAY CRUZ NA SIYANG NAGLABAS NG IMPORMASYON, ANG HINDI NIYA PAGKAILA SA NATURANG TEXT MESSAGE AY SAPAT NANG DAHILAN PARA MAPARUSAHAN SIYA.

PALIWANAG NG KORTE, DAPAT AY DUMISTANSIYA SI CRUZ SA KASO GAYONG NALALAMAN NIYANG KAMAG-ANAK NIYA ANG PARTIDONG KALABAN NI ANG. DAHIL SA PAGTE-TEXT NIYA KAY SHERIFF ANNANG, TINANGKA NIYANG PAKIALAMAN ANG KASO AT HADLANGAN ANG PAGPAPATUPAD SA UTOS NG KORTE. (A.M. No. P-04-1822, Sinfroso P. Ang vs. Arniel E. Cruz, Clerk III, Office of the Clerk of Court, Regional Trial Court, Cabanatuan City, February 6, 2006)